DA FONT DE ME ANIME

Da font de mê anime 'o gjolt, 'o esulti,
il miôr, de mê musiche a Diu lu cjanti
che ancje se piçule s'impense di me:
da font de mê anime cjantin al gran Re! 
 
O jeri tant puare e mi à preferide,
parceche plui libare in cûr mi à cjatade
par chest ogni anime mi benedirà:
o jeri tant puare e Diu mi cjalà.

 

 ESTRATTO DALL'OMELIA

Predica nella Messa del XXV dalla morte di pre Checo (20 nov.2011)
don Dino Pezzetta, plevan di Montenârs in ta glesia di Sant’Elina

          I feveli in marilenga, se no propit tal lengaç di San Denêl, e nancja  in chel di Montenârs, ma in chel furlan di Osôf che jo i ai imparât sui genoi di me mari (coma cal diseva pre Checo!).
          E no ûl fa nissuna predicja, ma puartâ  un pâr di ricuarts e fâ qualchi pičula considerazion.

          Intant un prin ricuart. Jo i ai incuintrât pre Checo tal 1966, a Udin, in sala Brosadola, sentât dongja in prima fila,  a sintî il vescul Zaffonato ch’al cjacarava dal Consei Ecumenic  Vatican II (come ducj i vescui dal mont al veva partecipât ai grants lavôrs da glêsia universâl). Jo i eri a pena tornât das Gjermanias, fresc di studis protestants e seneôs di  puartâ a nestra int la glêsia gnova, che – finalmentri – avarès vût di cambiâ. Lui, pre Checo, al era vignût a sentî las gnovas che il vescul  al varès puartât di Roma.
          Al è stât cussì ca è  comenzata la me colaborazion cu la “Scuela di Teologja pai Laics”, da pôc inmaneada  da pre Checo, sul mont gnûf che si discuvierzeva cul Consei Ecumenic.

          Un secont ricuart - Qualchi setemana dopo il taramot dal 76, in tun salon da Curia di Udin,   i mi sei cjatât ancjemò una volta sentât dongja a pre Checo, che il vescul Battisti al veva clamât  (coma me)  a fa part di una Comission Teologjca ch’a varès vût di judâ la nestra int a mantignî salda  la fiducia in tal Signôr che nol bandona mai  il so popul (sun t’un mûr di Glemona, cualchidun al veva scrit in grant “Signôr sveiti!”).
          La me storia, ancja teologjca, a è diferent di chê di pre Checo.  - Par 5 aigns jo i ai studiât ta stessa sô universitât  (la Gregoriana di Roma) e i ai vivût a cunfin cul Russicum che lui al à frequentât (io i eri al Collegjo Lombardo). Ma jo i sei deventât predi 18 aigns dopo di lui, tal 62, lui tal 44. In chei 18 aigns al è cambiât il mont.  I ultins doi aigns di vuera, cun bonbardaments e copamens i aigns di miseria dal dopovuera, il Friûl ch’al cambiava il mût di vivi (e di crodi), che da contadin al deventava industriâl.  E in ta glêsia un Consei Ecumenic di ducj i  vescui dal mont a scombati per 4 aigns a Roma par cambiâ ancja il mût di vivi la fede in tal mont di vuè.  
          Dos vitas diferents, e diviersas ancja las nestras esperiencias, in Italia e a tor pal mont, e  i rapuarts cu la las istituzions, grops, moviments. E ancja la passions. 

          Ma cumò no sei chi a ricuardâ las diferenzas.  Pre Checo a nus à lasâz un cuart di secul aromai, e intant  jo i sei deventât il so plevan, che vuè a lu ricuarda.
          I us disarai che a lui jo i mi cjati leât in cè che, a la fin fin, plui di dut al conta. Tancj, ancja in chescj dîs, a lu ricuardin coma om di cultura e di grandas pasions, coma grant combatent pal nestri popul e pa nestra glesia, sclet, coragjôs, libar.  Vuè, a un cuart di secul da so muart, in ta so glesie di Sant Eline jo i ûl ricuardalu soradut – cu la so e me int – coma un om di fede.
          Lui al à tant scombatût e sufiert, ma parce ch’al crodeva.  Al à vivût sinpri  da om libar e al à predicjât sinpri e a ducj che nô i vin di vivi no come i sotans, ca stan sot, ma coma fîs di Diu, parceche ogni om al è fî di Diu e al è stât clamât a vivi in libertât.
          Par pre Checo la libertât a no ven daspò, a no ven regalada o conceduda da qualchi âtri, e tant mancul da chei ch’a stan parsôra, ch’a comandin. I oms a nassin libars e a an di i di vivi libars.
          I ai let propit in chescj dîs las predicjas ch’al à fat, in chesta glesia di Sant’Elina, in tas 4 domenias di Avent dal 1944 (qualchi mês dopo jessi stat fat predi): tanta teologje dal seminari ma ancja tant coragjo placereàn.  A erin i ultins 5-6 mês di vuera, in t’un Friùl ocupât e sdramazât, in t’un Montenârs là cha pasonavin i cjavai e i camei dai mongui e sul Fuart di Osôf a erin di stanza i militârs todescs e fasciscj, e su las mons di Flaipan partgjans e titins. E lui al tonava su chei ch’a comandin cuintra il popul, in Friúl e in Italia, ma ancja in  Giermania e in Russia.
          Cuant chi pensi che jo, propit in chei stes mês di novembar e dicembar, a 15 kilometros di distanza, i servivi messa al plevan di Osôf  e al pope dai cosacs tal rifugjo dal Fuart, e i comenzavi a sintî i prins sbisiaments di voja di fâ il predi…
          Chesta passion di libertât no jè mai vignude a mancjâ a pre Checo. Anzit, muarts i fgasciscj, i naziscj, i russ, i sorestans di combati a son deventâts via via i partîts pulitics, la curias dai vescui e congregas dai predis, fintramai il Signôr. Si, il Signôr ch’al varès di cjacarâ e che invezit al sta cidin: tal taramot dal Friûl e tai pičui e grandts taramots da nestra vita.

          Îr sera i vin meditât ancja su chest aspiet di pre Checo, cun t’un vôli su pre Checo e un su Jesù su la crôs ch’al berla: “Diu gno, Diu gno, parcè mi àstu bandonât?”. 
          Om libar e mestri di libertât, pre Checo al à scombatut ancja cul Signôr. O di fede e di conbatiment coma il grand patriarcja Jacop (pre Checo al à dât il miôr di sé ta traduzion da Bibia propit voltant las pagjnas dai patriarcs Abram, Isac, Jacop).
          E alora i volarès sierâ il gno discors cun t’un  toc da storia biblica di Jacop: “In chê stesse gnot, (Jacop) al jevà, al ciapà su lis sôs dôs feminis, lis sôs dôs siervis, i siei undis fîs e al passà il flum Jabok. Ju ciapà su e ju fasè passâ l’aghe e al fasè passâ ancje dut ce ch’al veve cun sé. Dopo, Jacop al restà dibessôl. E un al lotà cun lui fin quanche al cricà il dì. Viodint che nol rivave adore di vincilu, j molà un colp tae cidule dal ombul e a Jacop si dissipà l’ombul intant ch’al lotave cun lui. Dissal chel âtri: “Molimi, ch’al ven dì!”, ma Jacop (pre Checo) j rispuindè: “No ti moli fin che no tu mi às benedît”. J domandà: “Ce non astu?”.  “Jacop “ j rispuindè. E lui: “No ti clamaran plui Jacop ma Israel, parceche tu às tignût dûr cuintri Diu e cuintri i oms e tu le às vinčude”. Jacop fasè cheste domande: “Par plasê, disimi il to non”. Ma chel âtri rispuindè: “Parcè mi domandistu il gno nom?” e, in chel, lu benedì (dal libri da Gjenesi, capitul 32).
          Eco, pre Checo coma Jacop. Al à lotât,  al à tignût dûr cuintri i oms e cuintri Diu, e al à vinčude, cencia mai viodi in mûsa chel Signôr che nessun al pos mai viodi, ma sol in lui crôdi e sperà. don Dino

Domenica 20, la chiesa di S.Elena è affollata come non mai per la Messa in marilenghe.

           Celebra, insieme al grande amico di pre Checo don Bruno Buzzulini. il parroco don Dino che ricorda pre Checo in due momenti particolari del loro rapporto (nel 1967, subito dopo il Concilio Ecumenico, e alcune settimane dopo il terremoto del Friuli). E ne esalta la figura di compagno di cammino, maestro di vita e pastore di fede. Lo ricorda in particolar modo quale campione di libertà, un lottatore che non ha avuto paura di confrontarsi  con gli uomini e finanche con Dio, come il patriarca Giacobbe. Al termine della celebrazione prendono la parola il sindaco Antonio Mansutti per interpretare i sentimenti di riconoscenza che la nostra comunità prova, oggi e da sempre, per questo suo figlio con il quale Montenars ho ormai indissolubilmente legato – nel mondo – il proprio nome. “Montenârs al  ûl dì pre Checo”. E poi interviene  il presidente della Provincia di Udine Pietro Fontanini: pre Checo ci ha insegnato molto e oggi, a 25 anni dalla sua morte, vediamo quanti e quali siano i frutti che maturano nel nostro Friuli. Lui ha avuto il coraggio del combattente. Ed ha vinto. Per questo, dopo la Messa, deporremo sulla sua tomba la corona che spetta agli eroi: la corona d’alloro.
          La liturgia eucaristica è molto partecipata. I cantori di Artegna e di Montenars eseguono, insieme all’assemblea, i più bei canti religiosi del nostro Friuli. Tante le intercessioni che si levano al Signore nel ricordo riconoscente per questo nostro fratello. Anche una bambina vuol pregare per lui a nome di tutti i bambini della nostra  comunità. E don Bruno Buzzulini, parroco per diversi anni a Montenars e amico e confidente di pre Checo, saluta la vecchia comunità ricordando la grande fede del vecchio amico e confidente. Dopo la Messa, tutti al cimitero per la posa della corona e il canto di commiato Ave o Vergjne us saludi. (don Dino Pezzetta)

Montenars (UD), 20 Novembre 2011
Messe in Marilenghe
IN RICUART DI PRE CHECO