Il discors dal President Federico Vicario al Congrès di Martignà

          Cjârs Cunfradis, Autoritâts e Amîs, al è cun grant plasê che us puarti ancje jo, a non de nestre Societât Filologjiche, il plui cordiâl benvignût al Congrès di Martignà, ta cheste biele curnîs di int rivade di dut il Friûl, dal Venit e di Triest. E je une prime volte pal nestri Congrès sociâl, culì a Martignà, une comunitât ch’e vîf di storie, di art, di tradizions, di culture, ma ancje di lavôr, di ambient, di nature, une comunitât di int dinamiche e laboriose, une comunitât ch’e à vût tai ultins agns un grant disvilup economic e sociâl, ch’e je une vore cressude di popolazion, un teritori ch’al vîf ancje de memorie di grandis personalitâts de culture furlane. O saludi, in particolâr, i amîs de Associazion “Furlans-Trevisans-Belunês”, simpri cun nô, chei di Manià, chei di Aquilee, chei di Cordenons, chei di Orsarie, cun Renella, il President Pelizzo, ma ancje i rapresentants des istituzions, ch’a àn puartât o che nus àn mandât il lôr salût (a’nd è tancj, tra parlamentârs e conseîrs regjonâi, ma ancje il Retôr Alberto De Toni, il President dal Ent Friûl Adriano Luci e altris) e i rapresentants di ents ch’a son culì cun nô, il President de Fondazion CRUP Lionello D’Agostini, l’assessôr Federico Pirone dal Comun di Udin, l’amì Walter Tomada de ARLeF. Tra chei ch’a son stâts aministradôrs dal Comun, duncje pe dimension locâl di cheste manifestazion, o viôt in sale Ferruccio Saro, ch’al è stât sindic, assessôr regjonâl e ancje senadôr, Edi Picco, ancje lui sindic e colaboradôr dal Numar Unic, Iginio Colussi e Mauro Delendi, ch’o vin chi la sûr e la mari Anna Burelli (une des fondadoris e component di Risultive), che ancje lôr a àn colaborât al nestri Numar Unic.
          Cun chest di Martignà dal 2016 o sin rivâts, alore, a cuote novantetrê pai Congrès – ancje se la Societât di agns a’nd à di plui, esatamentri novantesiet e si svicine il moment, pardabon no lontan, dal centenari di fondazion. Al è chest un apontament aromai tradizionâl par dute la Furlanie, il Congrès, une tradizion simpri gnove e un plasê simpri gnûf chel di cjatâsi cussì, in famee, par cognossi miôr la nestre tiere, par presentâ ce ch’o vin fat, ce ch’o sin daûr a fâ, ma ancje par pensâ a ce ch’o vin di fâ. Une biele sodisfazion, us dîs la veretât, rivâ a chest moment dal Congrès, cuant che dutis lis robis a son ladis al so puest, un Congrès ch’al nas une vore prime dal dì che si cjatisi culì: la programazion ch’o cirìn di fâ e je almancul trienâl, za cumò o savìn che l’an cu ven o sin a Mueç (o vin chi il sindic, Giorgio Filaferro, ch’ò saludi), l’an dopo a Colorêt e l’an ancjemò dopo, ch’al è l’an dal centenari, o vin za un pâr di buinis ideis, ri resonâi parsore. E cussì o sin chi, dopo di vê vût lis manifestazions di cheste ultime setemane, in preparazion dal Congrès, e altris manifestazions nus spietin tal mês di Otubar.
          Lis resons dal cjatâsi chi a Congrès, un apontament tradizionâl par nô, o disevi, un moment par fâ il pont de situazion, pal nestri Sodalizi e pe nestre comunitât regjonâl. Cemût podìno interpretâ o considerâ cheste ocasion? Ise dome une tradizion, che si ripet di an in an, une des nestris liturgjiis? E propit cheste domande mi à fat chê altre dì l’amì Silvano Bertossi, gjornalist dal Messaggero, Silvano che ancje vuê al è chi cun nô e che lu ringrazii dal so lavôr. Dopo di vêmi domandât de cuistion de omologazion culturâl, ch’e interesse ancje nô, come ducj, mi à dite: “A son dibot cent agns che la Societât Filologjiche si bat par mantignî la furlanetât, cu la sô identitât e i siei valôrs: ma la sô, ise une bataie sintude e condividude de int?” Domande centrâl, par nô.
Sclarî il discors de omologazion culturâl pe nestre comunitât, par scomençâ, al è za un pont impuartant di riflession. Omologazion al vûl dî adatâsi, adeguâsi, uniformâsi; omologazion al vûl dî fâ di mancul de nestre identitât, de nestre individualitât, dai valôrs e dai savês ch’o vin fat sù tal cors de Storie, des relazions ch’a lein e ch’a tegnin sù la comunitât locâl, te sô dimension interne e tal rapuart cu lis altris comunitâts dongje di nô; omologazion al vûl dî dismenteâsi di ce ch’o sin par cjapâ sù modei e compuartaments ch’a rivin dal di fûr e che, magari, nancje no cognossìn cussì ben – al sarès masse facil fâ riferiment al ûs dal inglês, ch’o strambolotìn dispès peraulis che no savìn ce ch’a vuelin dî.
          Resonìn, duncje, di omologazion. Lis culturis a vivin, a cressin e si miorin cul cjatâsi, cul metisi in relazion e cul confrontâsi, no sigûr cul sierâsi, cul dineâsi o cul scombatisi, ma a la fonde di dut chest discors al è il cognossisi e il capîsi. La cognossince e je cuistion preliminâr e fondamentâl, par ducj, e lis istituzions culturâls, come la nestre, a àn il dovê di favorî cheste cognossince e cheste comprension. A son chei ch’a disin che l’erba del vicino è sempre più verde, propit par intindi e significâ la miopie (e in cualchi câs la stupiditât) di chei ch’a pensin di cjatâ soluzions e rispuestis dome se a vegnin di fûr, ma no si preocupin, prime, di cirî chestis soluzions e rispuestis a cjase lôr. Prime di cjalâ il colôr de jerbe dal vicin (par viodi cetant ch’e je verde), cirìn di dâi un cuc ae nestre, di jerbe: no savìn il colôr de nestre jerbe, di fat, no savìn nancje se le vin, la jerbe. Fûr di metafore, se la jerbe e je la culture, cirìn di cognossile ben, cheste culture, prime di judicâle e di valutâle plui o mancul buine di rapresentânus, plui o mancul adeguade ai timps. In câs contrari, se no vin elements di judizi, alore il nestri al è dome prejudizi e preconcet, un prejudizi e un preconcet ch’o lin a esercitâ adiriture cuintri di nô stes, cuintri dal nestri jessi. Studiâ e fâ cognossi la culture, i valôrs e l’identitât dal Friûl al è duncje un nestri compit specific propit par proponi un’altre vision dal mont (i todescs a disin Weltanschauung), par ufrî un model culturâl alternatîf rispiet a chel de omologazion, che si dîs ancje globalizazion, che nus rive sot par dut. E chest model culturâl alternatîf nol è un model cualsisei, un dai tancj, al è un model speciâl, al è il nestri, o sin nô. L’omologazion si bat, duncje, cu la culture e cu la cognossince, cu la promozion dal nestri mût di jessi e di vivi, cul presentâsi plui fuarts e plui consapevui al confront cun chei altris.
          Ma, mi domandave Silvano Bertossi, se e je une bataie isolade, la nestre, o se invecit o vin la int cun nô. Jo no ai une rispueste definitive, a cheste domande, ma o pues dîus ch’o cirìn di interpretâ te maniere plui inclusive e plui vierte pussibil la nestre funzion di istitût di riferiment pe culture furlane e che cualchi risultât impuartant, e positîf, o rivìn a vêlu. No si trate dome di Congrès sociâl e di Fraie de vierte, chi si trate di un lavôr ch’al impegne i nestris socios, i nestris amîs e la struture dal nestri Istitût ogni dì de setemane (e ancje la domenie), dut al an. Si trate, par dâus dome cualchi element, dai cors pratics di lenghe e culture furlane, chest an in vincjecuatri comuns. Si trate de Setemane de culture furlane, che ancje l’an passât o vin fat, tal mês di Mai, 110 events di promozion culturâl (cu la colaborazion di desenis di associazions, prolocos, comuns); e tra l’altri i prodots de Setemane de culture a durin dut al an, se si pense ch’o vin presentât la nestre mostre Friûl ferît sui cuarante agns dal taramot za in cuatri localitâts (e cumò e je te Badie di Rosacis); che îr al Museu etnografic dal Friûl, a Udin, o vevin la scree de mostre sui fradis Pascolo e la lôr produzion artistiche, mostre nassude pe Setemane de culture cu l’associazion “Amîs di Vençon” e presentade ancje a Darte e a Malborghet; ch’o vin vude l’ocasion di replicâ events come Di jerbas e di suns in ricuart di Giorgio Ferigo, ma ancje di viodi il spetacul vincidôr dal premi de Associazion teatrâl furlane Une dì une gnot, presentât in Mai a Orsarie, ch’al è partecipât cuntun biel sucès ae rassegne dal “Libero Teatro” di Salerno tal mês di Setembar. E o podarès lâ indenant.
          O disevi di un percors, il nestri, ch’al cîr di creâ e consolidâ une rêt largje di culture, di personis e di associazions, par condividi azions e iniziativis, pensant par esempli a lis istituzions che si son dadis dongje pal progjet Identitât culturâl dal Friûl, inmaneât cun Deputazion di Storie patrie, Academie di Udin, Academie di Pordenon, Istitût Pio Paschini, Universitât popolâr di Udin, cu la poie de Fondazion CRUP; e dopo o pensi ai incuintris su la promozion de lenghe furlane e des personalitâts ch’a àn puartât indenant il valôr de autonomie, ch’o vin in program cui ents ricognossûts te leç regjonâl 27, articul 14 (Istitût ladin-furlan, Glesie furlane, Patrie dal Friûl, Onde furlane, Radio Spazio 103 e altris). E un altri valôr fondamentâl, o riten, al è chel de continuitât di cheste nestre azion di promozion culturâl, parcè che dome la continuitât e rive a dânus, a ducj, ponts di riferiment sigûrs. Us fâs un esempli. L’idee di publicâ un diari bilengâl furlan-talian pai fruts des scuelis primariis e dâural fûr, sore nuie, a chei che lu domandin, e je une idee buine, otime, straordenarie, ma no baste. E je la continuitât di cheste azion a jessi valôr fondamentâl intune prospetive di cressite culturâl de comunitât e cussì a son aromai vincjetrê i agns ch’o fasìn il diari bilengâl Olmis e che lu din fûr in 24.000 copiis ogni an – par un totâl di 500.000 copiis, tai agns, un numar che nol esist pe nestre dimension editoriâl regjonâl – e, cun di plui, vint la poie e il jutori par ducj (e o sotolinei ducj) i vincjetrê agns di Olmis di une istituzion come la Fondazion CRUP, ch’e je simpri une vore atente a promovi la culture e il teritori. E ancje di chest o ringrazìn la Fondazion CRUP e il President Lionello D’Agostini, une istituzion che no si spint una tantum, ma ch’e je pronte a garantînus une man (e ancje dôs) tal timp, parcè ch’e crôt in nô, in chest progjet e in cheste colaborazion.
La continuitât al è il nestri valôr: cu lis rivistis, cui studis e lis publicazions, cu la biblioteche e il gnûf Centri di documentazion su la scuele, cu la comunicazion sui gjornâi e in rêt, cun cuatri sedis sul teritori e cul contat, costant, cu lis comunitâts furlanis tal forest, cu lis colaborazions cun chês altris minorancis lenghistichis (i slovens, prime di dut, ma ancje i ladins e i todescs). Mi fermi chi. Se no rivìn a vê i risultâts ch’o sperìn di vê, parcè che la prospetive di miorâsi e fâs part de nature umane e o vin di tignîle simpri ben prisint, cheste prospetive, l’uniche maniere e je chê di lavorâ ancjemò di plui, no viôt alternativis. Jo no sai cetant che la nestre int i ten ae culture furlane e al nestri jessi furlans (ancje pal discors di omologâsi o di no omologâsi, ch’o ai fat prime, cu la globalizazion e dut il rest). Jo o pues dome dîus che ca di trê agns o rivìn al centenari di fondazion dal nestri Sodalizi e che o cirarìn di presentâ ae nestre comunitât un rindicont di sostance e di vision, o cirarìn di cjalâ indenant par fâ in mût che i nestris zovins, ancje un doman, a puedin continuâ a sintîsi e a clamâsi furlans.
          O passi a concludi il gno intervent cui ringraziaments a chei ch’a àn lavorât pal bon pro dal nestri Congrès di Martignà. Prime di dut lu ringrazii lui, siôr Sindic, e cun lui dute la zonte e il consei comunâl, in particolâr l’assessôr Gianni Nocent, la biblioteche civiche cu la bibliotecarie Eva Brollo e i uficis, dute la popolazion di Martignà pal bon acet che nus à dât, pe colaborazion te redazion dal Numar Unic, pe disponibilitât a condividi programs e iniziativis ch’a compagnin la nestre fieste. Un ringraziament, no formâl, a Bons. Guido Genero, ch’al à celebrât la Sante Messe, ae corâl parochiâl e al Mestri Federica Nobile, ai reladôrs di cheste zornade dal Congrès, ai amîs di Martignà che cun gjenerositât nus dan acet a cjasis, vilis e glesiis dopo gustât; par no dî, naturalmentri, dal personâl de nestre Societât, il Diretôr Feliciano Medeot, cun Marilena, Daniela, Katia, Alessandra e Elena, ma ancje i volontaris dal servizi civîl nazionâl, che nus judin cun tante buine volontât. Il nestri agrât speciâl, pardabon speciâl, al è però pal curadôr dal Numar Unic, Carlo Venuti, nestri Vicepresident pal Friûl centrâl, Carlo Venuti ch’al à passât i ultins mês al lavôr in redazion e in tipografie, a ducj i colaboradôrs di cheste monografie, un tesaur pal nestri teritori, e a dutis lis ativitâts economichis di Martignà, che cun gjenerositât a àn contribuît a sotoscrivi lis copiis dal volum e a finanziâ une part di cheste spese cussì impegnative: in primis la Bancje di Credit Cooperatîf, il Grup Bardelli Città Fiera, la dite di legnams Luvisoni, i traspuarts Ceccarelli e la Tende Pratic di Orioli. E ancjemò un ringraziament a ti, Carlo, par dut il lavôr che tu âs far par organizâ lis manifestazion prime e dopo dal Congrès: graziis di cûr.
          Une ultime robe. L’an cu ven, pal Congrès numar novantecuatri, o sin a Mueç, un’altre biele localitât dal nestri Friûl, une localitât che nus spiete par dânus un acet di gale. A son ancje altris lis localitâts che nus spietin e che magari no sin ancjemò stâts, cul Congrès: ma, come ch’o dîs simpri, la Societât Filologjiche Furlane e à buine memorie e o rivarìn par dut.
          Buine fieste a ducj nô!
          Federico Vicario, Dean de Societât Filologjiche Furlane