gnovis dal Friûl e dal mont
16 Aprile 2001

Pascute a Badie di Rosacis

In mattinata, visita all'Abbazia e Santa Messa organizzata dalla Società Filologica Friulana

Edi Bortolussi Daniele Macorig
Sindaco di Manzano
Walter Peruzzi


La Messe par furlan

LA BADIE DI ROSACIS
(La presentazione di Valter Peruzzi)

        Benvignûts in chest lûc cussì plen di fede e di storie.
Rosacis al cjape il non des tantis rosis ch'a nassin spontaneamentri dulintôr e ch'a sflurissin ancje d'inviâr.
Il clime cassù al è unevore bon e cussì a cres ben ancje la vît e l'ulîf. Insume al è un puest dulà che si stà ben cul cuarp e cu l'anime e chest lu àn capît tancj e tancj agns indaûr chei ch'a lu àn scuviert prin di noaltris.
Si conte che tal 800 un rimit che forsit si clamave Aleman o ch'al vignive de Gjarmanie, si ritirà culì e al à fat su un cjasot e un oratori tal bosc su chestis cuelinis e tancj di lôr a corevin par domandaj conseis e a preà.              Plancaplanc unevore di personis si metèrin adun cun chel rimit e, insieme, a cirivin di judâ i puârs ch'a vivevin tes capanis o tai cjasariçs, cirint di insegnâur a lavorâ la tiere e a bonificâ il palût atorvie. Il lûc al deventave simpri plui cognossût, ancje parceche a jerin vignûts dongje i fraris ch'a lavin daûr des regulis di Sant Agustin e la int vulintîr ur veve dât una man a fâ su la glesie, screade tal 1070, e po il monastîr, finît tal 1090, cuant che il patriarcje acuileiês, Vodolric di Ortemburg, frari di Sant Gjâl in Svuizare, al jevâ il monastîr in badìe.
        Subit dopo ducj, il Patriarcje e i siôrs dal dulintôr e soredut i Conts di Gurize, e àn capît l'impuartanze ch'al stave cjapant il sît e cussì e àn scomenzât a fâj donazions e regaliis stant che sot de jurisdizion de Badìe a jerin tancj paîs e, tra chescj, une trentine de zone, dal Lusinz fin a Tarvis e il marcjât di Monfalcon.
Daspò e àn sgjavât il cjanâl de roe di Manzan e metût su i mulins là che si pajave ancje la tasse sul masanât. Dopo bataiât cui Ongjars (ch'a rivàrin chenti tra il 899 e il 950) e cjatade la pâs, la Badìe e à podût vê, tal XIII secul, il so plui grant moment di sflandôr.
        Intant, al puest dai Agustinians, a jerin rivâts i Benedetins cul abât Gjerolt, un sant om di divignince di Milstatt in Carinzie e i Conts di Gurize a partecipavin ae elezion dal Abât ch'al jere dacjâf dal Ordin. Il pape Inocent VI al à concedût il privileç a Raimont, abât de Badìe, la autoritât di vescul e di celebrâ dutis lis funzions di chest rango, al jere come un princip e al votave tiarç tal Parlament. Cà al jere un seminari, siet capelis dulintôr, un ricovero pai vecjos e puârs, cun tun ospedâl ancje pai lebrôs.
In chel timp l'abât al veve un guviarnadôr ch'al faseve rispietâ la justizie e te zone e jere ancje une preson. Chel sorestant, in plui de justizie, al ministrave lis tassis e al dirigeve i magazens e cundiplui al furnive ancje lis miliziis pal esercit patriarcjâl.
        Un taramot e lis vueris tra Udin e Cividât e àn ruvinât il lûc e dal 1400 la Badìe e à fat cun Cividât un pat di mutuo jutori e subit dopo a son stadis fatis su lis muris di difese e lis turiselis di vuardie, fasint deventâ la Badìe una fuartece.
        Il plui grant assedi ch'e àn scugnût sapuartâ i soldats de Badìe, al è stât cuanche dal 1422, il patriarcje Ludovì di Teck, al voleve tornâ a cjapâ posses dai siei teritoris, senze però vê fat i conts cu la Republiche di Vignesie, che jere deventade parone dal Friûl. Dopo un lunc assedi, i soldats dal Patriarcje a son rivâts a jentrâ tal monasteri e dopo vê fiscât ogni cjosse, e àn tajât la man gjestre e gjavât i vôi a ducj chei ch'a difindevin la fuartece.
        Dopo sdrumade la Badìe, in chel lûc a cressevin agazis e baraçs, ma po' e fo ricostruide e passade sot la jurisdizion dal Pape, ch'al proviodeve ancje a nomenâ l'abât, clamât Comendatari parceche nol jere mai presint in Badìe.
        Un dai Abâts di Rosacis, Gabriel Condulmier, al è ancje deventât pape cul nom di Eugeni IV, e si po' duncje ben capî che, subit dopo, la Badìe e jere tornade a flurî.
        Altre batoste a jè rivade pe Badìe tal 1509 cui soldats comandâts dal duche Oton di Brunswich che, dopo vê brusâts tancj paîs e àn distrut dut il lûc e copade dute la int.
        Dopo tancj agns tal puest dai Benedetins a jerin rivâts, a Rosacis, i Domenicans e l'abât comendatari Zuan Mateo Giberti si è dât ungrum dafâ par tornâ a meti a puest la Badìe cun tant bon gust. Al jere di Verone e al à clamât un so preseât paesan a piturâ la glesie: Francesc Torbido, arlêf dal grant Giorgion. A son siei i afrescs dal coro: la Trasfigurazion di Crist sul mont Tabor tal mieç, di une bande la vocazion di Sant Pieri e Sant Andree e par chê altre la Pescje miracolôse, sul sofit i cuatri simbui dai evengjeliscj e la steme dal Giberti.
        Cu la division dal patriarcjât di Aquilee in dôs diocesis: chê di Udin e chê di Gurize, tal 1751. La Badìe cussì e à scomenzât a piardi un pôc la sô impuartanze, tant che passade sot la diocesi di Udin, il vescul al è deventât ancje Abât plevan e la Badìe e jè stade ministrade di un vicjari diocesan fin al 1979. Fintramai ch'al à vivût il vescul Nogara, la Badìe e jè stade ancje residenze di prelâts ch'a vignivin tal periodo des feriis. Ancje Pio X, il Pape di Riese, cuanch'al jere patriarje di Vignesie, al à vût stât a polsâ te pâs des cuelinis de Badìe.
        Tal 1823 il vescul Emanuel Lodi al à cambiât un pôc dut dulintôr, butant jù il puint jevadôr, une tôr e une part dal monastîr al à fat fâ il zardin fat su in terace e la strade ch'a mene a Dolegnan.
Plancaplanc la Badìe e tornave a vê bisugne di jessi comedade e dopo il taramot dal 1976 e jè stade siarade par cualchi an e cun tun ristaur tant ben fat e jè tornade a vê un pôc dal so viêli sflandôr tal mieç di chestis bielis verdis cuelinis, plenis di ulifs e vignai inmagâts nus regale ancjemò un aiar di pâs.


La sale de Crocifission.
Culì al jere il viêli refetori dai fraris e l'artist Batiste Dell'Angelo, clamât "Il Moro", tal 1535, al à piturât chest maraveôs Crist in crôs.

Il Claustri.
Al fâs part de bande antighe de Badìe e sul mûr si viodin doi balcons a glove dulà ch'e son pituradis, tal secul XII, lis santis Catarine di Alessandrie e Scolastiche. Apene fûr de puarte de glesie si po' viodi une piture ch'e rapresente Sant Pieri. Parsôre si puedin viodi lis stemis dai Abâts, comendataris e no, fin al arcivescul Batisti. Tal mieç dal zardin si cjate il poç ch'al furnive aghe e vite al lûc.

Di front de Glesie.
Si cjàtin la sale de justizie e lis presons, cumò dopradis come cjasis di abitazion. Si po' viodi cussì, rigjavade, une part di colone dal sotpuartin ch'al stave sot de sale de justizie, dulà che la int e spietave di jessi clamade.

Il Zardin fat su in terace.
Lu à volût il vescul Emanuel Lodi e di culì si po' viodi il panoram dulintôr e jù fin al mâr.
 

Pomeriggio con canti e balli, animato dal Gruppo "Sot la nape" di Villasantina

Tardo pomeriggio con la celebrazione della Santa Messa
 presieduta dal nostro arcivescovo Pietro Brollo animata dalla
Corale di S.Giovanni "Lis vôs dal Natisòn"


Corale "Lis vôs dal Natisòn"