|
In ricuart di pre
Toni
“Une volte che no sarai altri cun vualtris, o sês distinâts
a restâ cence predi, e cheste no je propit une grande
disgracie. Ma la disgracie vere e sarès se, une volte che no
varês il predi, e cheste e je une prevision avonde facile,
si cjatassis a vê la glesie sierade, e cheste e podarès sei
une eventualitât. Al è za sucedût di une vore di bandis. Ma
vualtris o vês di fâ in maniere che chest no us sucedi. Sì,
e je vere che par fâ Messe e consacrâ al covente il predi,
ma par
 preâ,
par cjatâsi adun a proclamâ la peraule di Diu, par dâ sù
cualchi cjante, par dâ fûr il pan, il predi nol è
indispensabil. La vuestre glesie, che i vuestris vons a àn
tant fadiât e sudât, gjavantsi ancje la bocjade de bocje par
podê tirâle sù, chest puest sant e cjamât di storie e di
storiis, dulà che a son stadis batiadis, si son dadis dongje
par meti sù famee, a àn vût la ultime benedizion prime di
inviâsi bande de sepulture un sfulmin di gjenerazions di
chest paîs…, vêso di lassâ che le sierin par vie che al
mancje il predi? Al sarà mo pussibil di cjatâ framieç di
voaltris cualchi cristian o cristiane di sest e di sintiment,
degns di vignî chi che o soi jo par tignî sù une liturgjie
de peraule, par fâ cualchi leture cjapade sù de Bibie, par
resonâ, ancje, un tic su lis peraulis dal Vanzeli, par
intonâ un cjant. Si trate juste di impegnâsi, di preparâsi,
di sintîsi responsabii, di fâ, insome, ce che al varès vût
di sei fat ancjemò di cetant timp. Che, se daspò seculorums
di religjon, i predis e la gjerarchie no son stâts bogns di
tirâ sù cristians che a vedin di podê fâ une tâl, al sarès
pardabon un faliment.”
Po ben, al è propit chest
ce che pre Toni nus à vût simpri dit e racomandât dal moment
che al capità chenti. Alore di cuant che al è mancjât o vin
cirût di meti in vore i siei conseis, ancje se cuntune certe
fadie. Di fat, cundut che o sin dacuardi cun ce che lui nus
à pocâts a fâ, o vin di scugnî vinci chê tradizion, culture,
maniere di pensâ che a àn lidrîs che a tetin une vorone in
daûr intai secui e che a son cetant duris di tirâ fûr. Cumò
o paìn lis consecuencis, usâts come che si è a viodi intal
predi l’unic atôr, biel che la int e je spetadore plui o
mancul passive.
O vin par sigûr ancje la
gjerarchie de Glesie che, contrariementri a ce che al bateve
pre Toni, no nus da une man, ma che intai fats e fâs juste
il contrari, e no savìn nancje il parcè. Impen di sei
contente e braurose di viodi, di savê che cu la sô vore e à
tirât sù cristians che a son deventâts adults e che a son in
stât di lâ di bessôi pe strade segnade de peraule di Diu, al
pâr che e vueli tignîju simpri e par simpri sot des sôs
gabanis, par simpri fruts e dipendents.
O vin vût episodis une vore
elocuents di chest sisteme, doprâts propit intai rivuarts de
nestre piçule comunitât daspò de muart di un predi che al
cirive di sfrancjânus e di fânus cressi e deventâ
responsabii, che dut câs, in cheste ocasion, no intindìn di
discutint, a podaran sei altris moments, in câs, par fâlu.
A ogni mût, e o vignìn al
incuintri di usgnot. In ubidience, resonade, a lis
racomandazions di pre Toni, o vin intindût di impostâlu sul
stamp che, o crodìn, i varès plasût ancje a lui: cjatâsi, in
glesie, fra cristians e cristianis a preâ insieme cence
predi.
Cussì, un’ore prime che e
tacàs Messe si vin dâts dongje, cence grandis formalitâts, o
vin cjapât in man il librut dai Salms, che pre Toni lu veve
menât chenti e che cu la int a ‘nt cjantave un une ogni
volte inte Messe di jù pe setemane, e di li o vin lets chei
che ognidun dai “letôrs” al à crodût di lei, secont de sô
sensibilitât, e de circostance. Cun di plui, ogni tant o vin
ancje tignût sù cualchi cjante, di chês che pre Toni nus
veve insegnât intant che al jere cun nô.
E je stade une
“celebrazion” sclete, sintude, nus à parût ancje avonde
partecipade, dignitose; inmaneade di int che e crôt di vê
capît il messaç che pre Toni al à vût lassât e che e à volût
metilu in vore propit inte ocasion dal ricuart dai trê agns
de sô muart.
Po o vin vût la Messe,
concelebrade dai predis, naturalmentri: pre Roman, pre Tunin,
pre Dolfo e dal diacun Fiorino.
A son stâts moments
interessants, che nus àn fat vivi cun religjon il ricuart di
un om che, intant dal so passaç in chest mont, al à segnât
il cûr e il sintiment di une vore di chei ch’a à vût l’ocasion,
o la fortune, di intivâlu su la proprie strade.
Remo - Visepente, ai 23 di avrîl dal 2010 |
