Presentazione del libro "de senectute"

L'incontro è stato aperto da don Roberto Bertossi, parroco di Venzone, seguito da un breve intervento del Presidente della Provincia Pietro Fontanini. Ha quindi preso la parola pre Romano Michelotti di "Glesie furlane", che ha illustrato il contenuto del libro ed i progetti allo studio per raccogliere e catalogare tutti gli scritti di pre Toni Bellina. 

     A doi agns de muart di pre Antoni Beline, domenie 26 di avrîl, aes sîs sore sere in domo a Vençon Glesie furlane e presentarà la sô opare inedite “De senectute” e e celebrarà une messe pal inovâl.
     Tai dîs passâts la socie furlaniste e à ancje sotscrit cu la Provincie di Udin un protocl di intese che al impegne Palaç Belgrât a sostignî cun 80 mil euros la publicazion dal patrimoni leterari di pre Beline in une edizion complete e organiche. Daûr de convenzion a saran publicadis chestis oparis: “Sul at di voltâ pagjine”, “Par amôr o par fuarce?”, “Eutanasie di un Patriarcjât”, “Amôr di patrie”, “Fortunât il popul che il Signôr al è il so Diu”, “Rogazions”, “Cirint li solmis di Diu – V”, “Trilogie” e “De Senectute”.
     Ae sotscrizion dal document a àn partecipât il president de Provincie, Pietro Fontanini, e il president di Glesie furlane, Giovanni Pietro Biasatti, ae presince di pre Romano Michelotti, pre Antonio Cappellari, pre Giuseppe Cargnello, pre Lorenzo Dentesano e Christian Romanini. (Tratto da www.lenghe.net)

Progjet «Pre Antoni Beline: un profete pal Friûl di doman». Presentât domenie ai 26 di avrîl 2008 a Vençon, in ocasion de Messe pe ricorence dal secont aniversari de muart, il prin scrit de OPERA OMNIA di pre Toni: «De Senectute» inedit. Al'ere presint il president de Provincie di Udin, on. Pieri Fontanini.

     PRESENTAZION - A son bielzà doi agns che pre Antoni al à lassade la sene di chest mont. Jo, ma o crôt ducje chei che lu àn cognossût, stimât e scoltât, o sint ancjemò tant la sô mancjance, la sô amicizie, la sô peraule, la sô riflession, la sô cuintrileture su lis vicendis, lis problematichis e i dibatits che la storie umane ancje nestre e continue a furnînus. La sô mancjance le sint ancje tante int che no à vude la furtune di incuintrâlu di vîf, ma che ultimamantri si è svicinade ai siei scrits e cumò i dûl il cûr di no vêlu cognossût di persone.
     A distance di doi agns, Glesie Furlane e vûl ricuardâlu proponint chest scrit indedit “De Senectute”, une riflession su l’ultime stagjon de vite. Inedit e, magari cussì no, ancje incomplet. Pre Antoni al veve a pene scomençât a meti man: pocjis pagjinis splendidis. Come ducj i siei scrits si lu lei intun flât e cuant che si rive insomp al displâs che il discors si fermi a colp. Cun chel straordenari “Grazie, Signôr, ancje dal mâl là che nol siere lis virgulutis e nol met il pont, parcè che alc al veve di continuâ a scrivi. Cussì lu vin lassât!
     Par capî materialmentri cheste ultime fadie o doi lis datis che il so compiuter al segnave. Il file cu la Tabele, une sorte di telâr dal libri e che o metin al inizi de publicazion, al ripuarte cheste note: “Data ultima modifica: martedì 30 gennaio 2007 ore 15,56”. Al è duncje sul scomençâ cuant che al bute jù la liste dai argoments, prime di inviâ il lavôr. Il file cul Test al ripuarte cheste note: “Data ultima modifica: giovedì 19 aprile ore 15,38”. Trê dîs prime che il so cûr si fermàs.
     La Tabele provisorie che al veve preparât e je componude di 25 titui. Di chescj ant reste svilupâts sîs e scomençât il setim. Si trate duncje di une minime part. Ancje leint i titui dome segnâts tal telâr, si à l’idee di trop golôs e impuartant che al jere l’argoment par ducj nô ch’o vivìn tune societât che no amet di invecjâ, che no vûl preparâsi e dâ sens al ultin pas de proprie vite: bruts segnâi di insipience umane!
     Leint chest inedit si à la percezion che pre Antoni al sintive di jessi rivât dapît; il fisic lu steve molant: “O sint che il soreli al sta lant a mont”. Ma si percepìs ancjemò une volte dut il so vigôr interiôr.
     In chestis pocjis pagjinis si cjate poesie e sapience, contemplazion e resonament, fede e calôr uman, serenitât e lancûr, scletece e passionalitât, bibie e vite. Il dut armonicamentri componût. Ancje in chest librut si viôt che se la malatie e veve condanât pre Antoni a stâ fer, stant fer però al veve fate tante strade interiôr.
     Cert che cuant che si rive dapît al dûl il cûr a pensâ che al è dome un fruçon di une grande meditazion che l’amì pre Antoni al veve gust di lassânus. Ai 23 di avrîl dal 2007 l’ingjustri al jere finît e la sô vôs no rivave plui a fevelâ. Vôs cjalde e serene che però e continue a fevelânus tal cidin in dut ce che lui nus à lassât scrit.
     Par chest pre Antoni nol è lât vie, lontan; al è restât presint, dongje di ognun di nô.

Venzon, 26 di Avrîl 2009
Presentazion del libri "de senectute"
e Messe in ricuârt di pre Toni Beline
a doi agns da sô muârt
 

L
I
B
R
I

M
E
S
S
E